Əsəb xəstəliyi və yuxu
Xalq təbibləri məsləhət görürlər ki, əsəbləri sakitləşdirmək beyin və ürək damarlarının fəaliyyətini tənzimləmək üçün zirinc dəmləməsi içmək lazımdır. Zirinc dəmləməsi hazırlamaq üçün bir xörək qaşığı zirinci, bir stəkan qaynar suda on dəqiqə dəmləyib, üstünü örtür, sonra cunadan süzürlər. Ondan gündə üç dəfə, hər dəfə də yarım stəkan içirlər.
Pişikotu kökünü xırda-xırda doğrayır, qurudurlar. 20 qram götürüb 200 qram qaynar suda, 15 dəqiqə dəmləyir və ikiqat tənzifdən keçirirlər. Bu dəmləmədən gündə üç dəfə yeməkdən yarım saat əvvəl bir xörək qaşığı içirlər. Bu müalicə əsəbliyi və kəskin psixi gərginliyi aradan qaldırmaq üçün çox faydalı hesab edilir.
Yatağa girib uzun müddət yata bilmədikdə, belə bir vasitədən istifadə etmək yaxşı nəticə verir. Yatmazdan əvvəl bir stəkan təzə ilıq südə, bir çay qaşığı bal çalın və qurtum-qurtum için. Sonra bir parça qəndə 30-40 damcı pişikotu cövhəri damcıladıb sorun. Bu yaxşı yatmaq üçün ən münasib təminatlardan biridir.
