Tərxun bədənə istilik verir, mədəni möhkəmləndirir, iştaha gətirir, acqarına yemək ağızı bir qədər keyləşdirir. İnfeksiyayaqarşı təsirli vasitə hesab edildiyinə görə, vəba və taun xəstələrinin yayılmasına qarşı keçmişdə tərxundan çox istifadə edərdilər. Çeynəmək ağız yarası zamanı faydalıdır və ağızın qoxusunu ətirli edir.
Şüyüd bədənə istilik və quruluq verir, sidikqovucu və südqovucu xüsusiyyətə malikdir. Toxumu bu baxımdan daha qüvvətlidir. Gövdə və toxumunu qaynadandan sonra alınmış suyu sancını kəsir, yel və qazları özünə hopdurur. Xörək və turşularda şüyüd toxumu işlətmək xeyirlidir.
Vəzərinin həm yabanı, həm də dirrikdə becərilən növü var. Keçmişdə bu bitki sağlamlıq və güc rəmzi kimi tanınmışdır. Tərkibində bədən üçün lazım olan bir sıra faydalı maddələr olduğundan ona sağlamlıq göyərtəsi adı verilmişdir. Bu göyərti infeksiyaya qarşı mübarizə aparır, bağırsaqların işini yaxşılaşdırır, tənəffüs sistemini tənzimləyir.
Nanə bədənə istilik və quruluq verir, mədə və ürək fəaliyyətini qüvvətləndirir. Xörəkdə nanə işlətmək həzmə kömək edir, mədə üçün isə faydalı olur. Bağırsaq qazını özünə hopdurur, qatı qanı durulaşdırır. Nanədən alınan cövhər mədənin artıq şirə ifraz etməsinin qarşısını alır və mədə xorasından olan ağrıları sakitləşdirir.
